Alpha Boys’ School Get New Logo

Prof. Hubert Devonish, Co-ordinator, Jamaican Language Unit

Prof. Hubert Devonish, Co-ordinator,
Jamaican Language Unit, UWI

There are two spelling systems used for the Jamaican language below.  The first, which I call ‘chaka-chaka’, is based on English spelling. The second, ‘prapa-prapa’, is the specialist phonetic system designed by the linguist Frederic Cassidy.  It has been slightly amended by the Jamaican Language Unit at the University of the West Indies, Mona.  After the two Jamaican versions, there’s an English translation.

CHAKA-CHAKA SPELLING

ABS-NEW-LOGO-REDBig press conference keep up a Alpha yesterday fi show off di new logo fi di school. A long time now Alpha deh bout.  Inna 1880, Miss Jessie Ripoll buy 43 acre a land pon South Camp Road.  An she set up di Alpha Cottage fi look after poor people pikni. Fi di first, she did ongle tek een girl.

Inna 1884, Miss Ripoll decide fi start tek een boy pikni weh a gi trouble.  So dem seh. Plenty time a no di pikni dem a gi trouble.  A trouble tek dem.  Any way, Alpha school tek een di pikni dem an try wid dem fi keep dem outa trouble.

Inna 1890, govament gi permission fi Alpha turn ‘Industrial School’ an gi four shilling an eight pence fi di week fi di pikni dem, one-one. Dem time deh, a twelve pikni inna di school. Di pikni dem learn from book an dem learn fi use dem hand.  All a di pikni dem ha fi learn a trade.  Di school have a print shop, a woodwork shop, a tailor shop an a music shop.

lAn a music build up Alpha name over di year dem! A nuff-nuff big-time musician come outa Alpha: Dizzy Reece, Cedric ‘Im’ Brooks, Theophilus Beckford, Rico Rodriguez, Winston ‘Yellowman’ Foster, Vin Gordon, Harold McNair, Joe Harriott, ‘Deadly’ Headley Bennett, Leroy ‘Horsemouth’ Wallace, Leroy Smart an nuff-nuff more!

SKATALITES

holy-trinity-cathedral-jamaica1Di Alpha band start up inna 1892. Dem deh time, dem dida play drum an fife.  Den inna 1908, di school get some brass instrument from di Roman Catholic bishop. An a deh so dem buss out!  Come on to 1911, di band so good, di boy dem lead di march go a North Street fi bless Holy Trinity Cathedral.

An a so dem a gwaan.  Inna 1953, Alpha put on di first military parade fi honour di Queen coronation.  An dem keep up one big show, “March to Nationhood”, fi celebrate independence inna 1962.  Di Skatalites band form inna1964, an a four a dem come from Alpha: Tommy McCook, Johnny ‘Dizzy’ Moore, Lester Sterling an Don Drummond.

So hear how Alpha get new logo.  By di way, ‘logo’ a di pet name fi ‘logogram’.  Dat deh word mek up outa two Greek word – ‘logos’ an ‘gram’.  Logos mean word an gram mean enting weh draw or write, all like di letter dem inna di alphabet.  Dat simple mean, logo a di picture fi di word.

Freestylee-500pxMichael ‘Freestylee’ Thompson, one top-a-top Jamaican graphic artist, im draw one beautiful picture fi represent Alpha:  one lickle yute a blow im horn.  An yu can see seh di pikni feel im owna strength an know im power di way im a hold di horn.   Michael did put di picture inna di show weh dem did keep a National Gallery fi di “International Reggae Poster Contest” weh im did organize wid a next graphic artist, Maria Papaefstathiou, weh come from Greece.  When di head a Alpha, Sister Susan Frazer, see Michael poster, she know seh a it dat.  An a so Michael gi Alpha leave an licence fi use fi im ‘gram’ fi dem ‘logo’.  Rispek due!

PRAPA-PRAPA SPELIN

images-3Big pres kanfrens kip op a Alpha yeside fi shuo aaf di nyuu luogo fi di skuul. A lang taim nou Alpha a gwaan.  Ina 1880, Mis Jessie Ripoll bai 43 ieka a lan pan South Camp Ruod.  An shi set op di Alpha Cottage fi luk aafta puor piipl pikni. Fi di fos, shi did ongl tek iin gorl.

Ina 1884, Mis Ripoll disaid fi staat tek iin bwai pikni we a gi chrobl.  So dem se. Plenti taim a no di pikni dem a gi chrobl.  A chrobl tek dem.  Eni wie, Alpha skuul tek iin di pikni dem an chrai wid dem fi kip dem outa chrobl.

Ina 1890, govament gi pormishan fi Alpha ton ‘Industrial School’ an gi fuor shilin an iet pens fi di wiik fi di pikni dem, wan-wan. Dem taim de, a twelv pikni ina di skuul. Di pikni dem lorn fram buk an dem lorn fi yuuz dem an.  Aal a di pikni dem a fi lorn a chried.  Di skuul av a print shap, a udwok shap, a tiela shap an a myuuzik shap.

images-4An a myuuzik bil op Alpha niem uova di ier dem! A nof-nof big-taim myuuzishan kum outa Alpha: Dizzy Reece, Cedric ‘Im’ Brooks, Theophilus Beckford, Rico Rodriguez, Winston ‘Yellowman’ Foster, Vin Gordon, Harold McNair, Joe Harriott, ‘Deadly’ Headley Bennett, Leroy ‘Horsemouth’ Wallace, Leroy Smart an nof-nof muor!

Di Alpha ban staat op ina 1892. Dem de taim, dem dida plie jom an faif.  Den ina 1908, di skuul get som braas inschroment fram di Roman Catholic bishop. An a de so dem bos out!  Kom aan tu 1911, di ban so gud, di bwai dem liid di maach go a North Schriit fi bles Holy Trinity Cathedral.

SKATALITES

SkatalitesAn a so dem a gwaan.  Ina 1953, Alpha put aan di fos militeri paried fi ana di Kwiin karanieshan.  An dem kip op wan big shuo, “March to Nationhood”, fi selibriet indipendens ina 1962.  Di Skatalites ban faam ina1964, an a fuor a dem kom fram Alpha: Tommy McCook, Johnny ‘Dizzy’ Moore, Lester Sterling an Don Drummond.

So ier ou Alpha get nyuu luogo.  Bai di wie, ‘logo’ a di pet niem fi ‘logogram’.  Dat de wod mek op outa tuu Griik wod – ‘logos’ an ‘gram’.  Logos miin wod an gram miin enting we jraa ar rait, aal laik di leta dem ina di alfabet.  Dat simpl miin, logo a di pikcha fi di wod.

Michael ‘Freestylee’ Thompson, wan tap-a-tap Jamiekan grafik aatis, im jraa wan byuutiful pikcha fi riprizent Alpha:  wan likl yuut a bluo im aan.  An yu kyahn si se di pikni fiil im uona chrent an nuo im powa di wie im a uol di aan. Michael did put di pikcha ina di shuo we dem did kip a National Gallery fi di “International Reggae Poster Contest” we im did aaganaiz wid a neks grafik aatis, Maria Papaefstathiou, we kom fram Griis.  Wen di ed a Alpha, Sista Susan Frazer, si Michael puosta, shi nuo se a it dat.  An a so Michael gi Alpha liiv an laisn fi yuuz fi im ‘gram’ fi dem ‘logo’.  Rispek djuu!

http://www.reggaepostercontest.com/

ENGLISH TRANSLATION

ABS-NEW-LOGO-FINAL-CRVA big press conference was held at Alpha yesterday to unveil the school’s new logo. Alpha has been around for quite some time how.  In 1880, Miss Jessie Ripoll bought 43 acres of land on South Camp Road.  And she set up the Alpha Cottage to care for the children of the poor. At first, she took in only girls.

Then in 1884, Miss Ripoll decided to start taking in boys who were giving trouble.  Well, that’s what was said. Many times it’s not really the children who are giving trouble.  It’s actually a case of trouble finding them.  Anyway, the Alpha school took in the children and worked with them to keep them out of trouble.

In 1890, the government recognised Alpha as an ‘Industrial School’ and gave an allowance of four shillings and eight pence per week for each of the children. In those days, there were twelve pupils in the school. The students got both academic and practical training.  All of them had to learn a trade.  The school had a printery, a joinery workshop, a tailor shop and a music school.

images-6And it’s music which established Alpha’s reputation over the years! A lot of great musicians have come out of Alpha: Dizzy Reece, Cedric ‘Im’ Brooks, Theophilus Beckford, Rico Rodriguez, Winston ‘Yellowman’ Foster, Vin Gordon, Harold McNair, Joe Harriott, ‘Deadly’ Headley Bennett, Leroy ‘Horsemouth’ Wallace, Leroy Smart and many, many more!

SKATALITES

The Alpha band started in 1892 as a drum and fife corps.  Then in 1908, the school got some brass instruments from the Roman Catholic bishop. And that’s when the band took off!  By 1911, the band was so good, the boys led the procession to North Street to dedicate the Holy Trinity Cathedral.

skatalites-logo-blk-300x264And they just kept on going from strength to strength.  In 1953, Alpha put on the first military parade to mark the coronation of the Queen.  And they mounted a huge show, “March to Nationhood”, to celebrate independence in 1962.  The Skatalites band was formed in1964, and four of them come out of Alpha: Tommy McCook, Johnny ‘Dizzy’ Moore, Lester Sterling and Don Drummond.

So this is how Alpha got its new logo.  By the way, ‘logo’ is an abbreviation of ‘logogram’, which is made up of two Greek words – ‘logos’ and ‘gram’.  Logos means word and gram means an image, like a letter of the alphabet.  Simply put, a logo is a picture representing a word.

Michael put his picture in the show that was kept at the National Gallery for the “International Reggae Poster Contest”.  He co-organised the contest with another graphic artist, Maria Papaefstathiou, from Greece. http://www.graphicart-news.com/

When the principal of Alpha, Sister Susan Frazer, saw Michael’s poster, she knew instantly that that was it.  And that’s how Michael came to give Alpha permission to use his ‘gram’ for their ‘logo’.  Rispek due!

About these ads

2 thoughts on “Alpha Boys’ School Get New Logo

  1. Luv how yu differentiate between de two spelling system- dis a way yah mi can readily express misself an at de same time push misself fi learn de prapa-prapa spelling. Nuff rispeck!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s