There are two spelling systems used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist phonetic system designed by the linguist Frederic Cassidy. It has been slightly amended by the Jamaican Language Unit at the University of the West Indies, Mona. After the two Jamaican versions, there’s an English translation.
- CHAKA-CHAKA SPELLING
Mi sorry fi JTA. Inna disya hard time, govament waan cut tiicha pay! No sah! Notn couldn’t go so. Mi do understand wa mek Doran Dixon an Paul Adams ha fi a bawl out. Yu can’t sidong mek mongrel daag rush-rush yu an waan bite-bite yu up. Yu ha fi run di daag! Worse if di daag look like seh it deh pon cocaine! Dixon seh JTA a no no likl puss weh fraid fi mongrel.
Puss an daag no av di same luck. Govament can do an seh anyting dem waan. But teacher no fi seh notn. Dem fi just sup it. Dat can’t right. All Bible tell yu seh yu no fi provoke yu pikni to wrath. To rahtid! An JTA a no govament lickle pikni. Dem a big smaddy. Dem have chat.
Inna fi wi Jamaican language wi love use metaphor an simile fi describe how wi feel. An mi no waan nobody lost dem pass come tell mi seh ‘metaphor’ an ‘simile’ a no fi wi Jamaican word. If English can tief so much word from Greek, Latin, French, not to mention fi wi owna Jamaican language, wa mek we can’t tief too? Pon top a dat, wi no ha fi use no label fi talk bout how wi talk. Wi no ha fi seh, ‘Dis a metaphor.’ Wi just dweet.
When Paul Adams seh, “The minister must be temporarily injected by cocaine”, dat a metaphor. How im fi go know if di minister deh pon drugs fi true? Im no mean it dat way. Fi real. Im mean to seh, di minister sound like seh im lik im head. Im no righted. Or like wi seh inna one next metaphor, it look like duppy a follow him. Di minister nah behave normal.
‘PAGE 2’ MONGREL
Same way when Dixon throw word bout mongrel, a bex im bex. An im right fi bex. An im know weh im a seh. Yu mighta no like di metaphor im use. But yu ha fi admit seh im mek im point. Di best joke, though, inna Jamaica, daag-mongrel an man-mongrel a two different kind a mongrel. Daag-mongrel a di bad-breed mongrel weh no got no pedigree. Wi mek up nuff proverb bout dem deh careless mongrel. Tek for instance, “Sorry fi mawga daag, mawga daag turn round bite yu.”
Man-mongrel now, dat a one different-different story. Dem deh mongrel a di high-class mongrel. A dem run tings inna Jamaica. Look pon ‘Page 2’ inna di lickle beenie nyuuspiepa. A deh so yu see man an woman mongrel. Dem mix-up mix-up. Dem a no so-so black; an dem a no so-so white. Dem a no so-so Chiney or so-so Indian. Dem a lickle a dis an lickle a dat. Dem a ‘outa many, one smaddy’. Dem a di real-real tapanaaris Jamaican. An plenty so-so black people love mix up wid dem an gwaan like seh dem a mongrel fi true.
Anyhow, mi no know a which mongrel Dixon did a talk bout. Like a spite, it could a go two way inna dis ya case. If me was di minister, mi would a just go wid di man-mongrel an no bodder nyam up miself. After all, every daag have im day an every puss im 4 o’clock.
- PRAPA-PRAPA SPELIN
Mi sari fi JTA. Ina disya aad taim, govament waahn kot tiicha pie! Nuo sa! Notn kudn go so. Mi du andastan wa mek Doran Dixon an Paul Adams a fi a baal out. Yu kyaahn sidong mek mongrel daag rosh-rosh yu an waahn bait-bait yu op. Yu ha fi ron di daag! Wos if di daag luk laik se it de pan kokien! Dixon se JTA a no no likl pus we fried fi mongrel.
Pus an daag no av di siem lok. Govament kyahn du an se enting dem waahn. Bot tiicha no fi se notn. Dem fi jos sop i. Dat kyaahn rait. Aal Baibl tel yu se yu no fi provuok yu pikni tu raat. Tu raatid! An JTA a no govament likl pikni. Dem a big smadi. Dem av chat.
Ina fi wi Jamiekan langwij, wi lov yuuz metafa an simili fi diskraib ou wi fiil. An mi no waan nobadi laas dem paas kom tel mi se ‘metafa’ an ‘simili’ a no fi wi Jamiekan wod. If Inglish kyan tiif so moch wod fram Griik, Latn, French, nat tu menshan fi wi uona Jamiekan langwij, wa mek wii kyaahn tiif tu? Pan tap a dat, wi no ha fi yuuz no liebl fi taak bout ou wi taak. Wi no ha fi se, ‘dis a metafa’. Wi jos dwiit.
Wen Paul Adams se, “The minister must be temporarily injected by cocaine”, dat a metafa. Ou im fi go nuo if di minista de pan jrogs fi chruu? Im no miin it dat wie. Fi riil. Im miin tu se, di minista soun laik se im lik im ed. Im no raitid. Aar, laik wi se ina wan neks metafa, it luk laik dopi a fala im. Di minista naa biyiev naamal.
‘PAGE 2’ MONGREL
Siem wie wen Dixon chruo wod bout mongrel, a beks im beks. An im rait fi beks. An im nuo we im a se. Yu maita no laik di metafa im yuuz. Bot yu a fi admit se im mek im paint. Di bes juok duo, ina Jamieka, daag-mongrel an man-mongrel a tuu difran kain a mongrel. Daag-mongrel a di bad-briid mongrel we no gat no pedigrii. Wi mek op nof pravorb bout dem de kielis mongrel. Tek far instans, “Sari fi maaga daag, maaga daag ton roun bait yu.”
Man-mongrel nou, dat a wan difran-difran tuori. Dem de mongrel a di ai-klaas mongrel. A dem ron tingz ina Jamieka. Luk pan ‘Page 2’ ina di likl biini nyuuspiepa. A de so yu si man an uman mongrel. Dem miks-op miks-op. Dem a no suoso blak; an dem a no suoso wait. Dem a no suoso Chaini ar suoso Indyan. Dem a likl a dis an likl a dat. Dem a ‘out a meni, wan smadi’. Dem a di riil-riil tapanaaris Jamiekan. An plenti suoso blak piipl lov miks op wid dem an gwaan laik se dem a mongrel fi chruu.
Eni-ou, mi no nuo a wich mongrel Dixon did a taak bout. Laik a spait, it kuda go tuu wie ina disya kies. If mii woz di minista, mi wuda jos go wid di man-mongrel an no bada nyam op miself. Aafta raal, evri daag av im die an evri pus im 4 a’klak.
I’m sorry for the JTA. In these hard times, the government wants to cut teachers’ pay! That can’t be right all. I certainly understand why Doran Dixon and Paul Adams had to protest. You can’t carelessly allow a mongrel dog to rush you and try to bite you all over. You have to shoo the dog! Worse if the dog looks as if it’s on cocaine! Dixon said the JTA is no pussy cat that’s afraid of mongrel dogs.
Cats and dogs aren’t equally lucky. The government can do and say anything it wants. But teachers mustn’t say anything. They just have to put up with it. That can’t be right. Even the Bible says you mustn’t provoke your children to wrath. Hell, no! And the JTA isn’t the government’s little child. Teachers are adults. They have the right to speak out.
In our Jamaican language we love to use metaphors and similes to describe how we feel. And I don’t want anyone to make the mistake of telling of me that ‘metaphor’ and ‘simile’ are not really Jamaican words. If English can steal so many words from Greek, Latin, French, not to mention our own Jamaican language, why can’t we steal too? Furthermore, we don’t need to use a label to define how we use language. We don’t have to say, ‘This is a metaphor’. We just do it.
When Paul Adams says, “The minister must be temporarily injected by cocaine”, that’s a metaphor. How can he know if the minister is really on drugs? He doesn’t mean it literally. What he’s actually saying is that the minister sounds as if he’s not thinking straight. He’s lost it. Or, as we say in another metaphor, it’s as if a spirit is stalking him. The minister isn’t behaving normally.
‘PAGE 2’ MONGREL
In exactly the same way, when Dixon provocatively used the word mongrel, he was angry. And he had every right to be. And he knew exactly what he was doing. You mightn’t like the metaphor he used. But you have to concede he did make his point. The best joke, though, is that in Jamaica, canine mongrels and human mongrels are very different breeds. Canine mongrels have no pedigree. And there are lots of proverbs about those low-class mongrels. For instance, “If you take pity on a hungry dog it will turn on you and bite you.”
Now, human mongrels are a completely different story. They are high-class breeds. They are the elite of Jamaican society. Look on ‘Page 2’ in the tabloid newspaper. There you’ll find lots of human mongrels, both male and female. They are mixed breed. They are not fully black; and they are not fully white. They are not fully Chinese or fully Indian. They are a little of this and a little of that. They are ‘out of many, one person’. They are the genuine, top-class Jamaicans. And lots of ‘pure’ black people love to mix with them and get on as if they, too, are really mongrels.
Anyhow I don’t know which breed of mongrel Dixon was talking about. Quite contradictorily, it could go both ways in this case. If I were the minister, I would just go with the human mongrel and not bother to get upset. After all, every dog has its day and every cat its own time.