Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist phonetic system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.
- Chaka-Chaka Spelling
Mi no mean dead wid laugh. A di odder kind a funny mi a talk bout. Wa dem a call ‘queer’ inna dem ya time. Suppose Jesus was a B-man. Tink bout it. Im never married. An im par wid nuff man. Pon top a dat, ascorden to weh John write inna fi im book inna New Testiment, Jesus did av a special love fi im. A so John seh.
Den some Bible scholar claim seh a no ongle 12 disciple Jesus did av. A nuff more. Bout 70! Jesus come een like dem DJ an dem crew. Or di yuut dem weh go a dance wid dem one anodder an no dance wid no uman whole night. Nuff man inna bungle. Jesus did av uman fren. But some a dem never come offa no high table. Dem a prostitute.
Anyhow, mi no want nobody a pray God fi mi. So mek mi spell it out: Mi never seh Jesus funny. A aks mi a aks. An a no me one a aks disya question. Mi go pon Google an put een ‘Was Jesus a homosexual?’ Mi shock fi see 11,300,000 answer come up inna 0.28 second. Faster than Usain Bolt!
So hear wa mek mi a aks disya funny question. Yu see di parson man dem weh a stir up dem congregation gainst B-man? An a keep up demonstration outa road gainst di people dem weh a try fi change di buggery law? Mi no know wa dem deh parson man woulda do if dem find out seh Jesus was a B-man. Dem woulda ha fi go kill demself.
Or dem coulda start tek Matthew 7:12 serious an try treat odder people like how dem woulda want people treat dem. An dem woulda ha fi come offa dem high horse an memba seh dem a sinner. Some a dem said same parson man a commit adultery, an through a uman dem a sex, dem a gwaan like seh fi dem sin better than odder people sin. Sin a sin.
FROM PILLAR TO POST
An me want know wa dem parson man a seh an a do bout di yuut dem weh a bata-bata from pillar to post an cyaan find no weh fi rest dem head. Mi sorry fi di yuut dem. Dem bun dem outa uptown an dem cyaan go back downtown. But wat a way dem deh yuut chest high! A Millsborough, an Seymour Lands, an Cherry Gardens an Beverly Hills dem a squat. After all. If yu a squat, yu might as well av ambition.
But some a dem yuut a gwaan like leggo beast. Dem no av no behaviour. How dem fi out a yard stark naked inna di people dem good-good community? Dat a pure slackness. Out a out. But dem gone far out. Outa order. Dem buy on trouble pon demself. Dem no know how fi squat. Dem ha fi small up demself so nobody no notice dem to dat. Dem too bright.
Still for all, wi cyaan dash dem weh an gwaan like seh dem no belongs to wi. Dem a smaddy pikni, smaddy bredda, smaddy uncle, smaddy cousin, smaddy puppa. Wi dis ha fi claim dem. Dem a fambily. Dem a fi wi. An dem a God pikni. Same like Jesus. Dem a smaddy.
- Prapa-Prapa Spelin
Mi no miin ded wid laaf. A di ada kain a foni mi a taak bout. Wa dem a kaal ‘queer’ ina dem ya taim. Sopuoz Jesus woz wan B-man. Tingk bout it. Im neva marid. An im paar wid nof man. Pan tap a dat, azkaadn tu we John rait ina fi im buk ina di Nyuu Testiment, Jesus did av a speshal lov fi im. A so John se.
Den som Baibl skala kliem se a no ongl 12 disaipl Jesus did av. A nof muor. Bout 70! Jesus kom iin laik dem DJ an dem kruu. Aar di yuut dem we go a daans wid dem wan anada an no daans wid no uman uol nait. Nof man ina bongl. Jesus did av uman fren. Bot som a dem neva kom aafa no ai tiebl. Dem a prastityuut.
Eni-ou, mi no waahn nobadi a prie Gad fi mi. So mek mi spel it out: Mi neva se Jesus foni. A aks mi a aks. An a no mii wan a aks dis ya kweschyan. Mi go pan Google an put iin ‘Was Jesus a homosexual?’ Mi shak fi si 11,300,000 ansa kom op iina 0.28 sekan. Faasa dan Usain Bolt!
So ier wa mek mi a aks dis ya foni kweschyan. Yu si di paasn man dem we a stor op dem kangrigieshan gens B-man? An a kip op demonschrieshan outa ruod gens di piipl dem we a chrai fi chienj di bogri laa? Mi no nuo wa dem de paasn man uda du if dem fain out se Jesus woz a B-man. Dem uda afi go kil demself.
Ar dem kuda staat tek Matthew 7:12 siiriyos an chrai chriit ada piiipl laik ou dem wuda waahn piipl chriit dem. An dem wuda afi kum aafa dem ai aas an memba se dem a sina. Som a dem sed siem paasn man a komit adolchri, an chruu a uman dem a seks, dem a gwaan laik se fi dem sin beta dan ada piipl sin. Sin a sin.
FRAM PILA TU PUOS
An mii waahn nuo wa dem paasn man a se an a du bout di yuut dem we a bata-bata fram pila tu puos an kyaahn fain no we fi res dem ed. Mi sari fi di yuut dem. Dem bun dem outa optoun an dem kyaahn go bak dongtoun. Bot wat a wie dem de yuut ches ai! A Millsborough, an Seymour Lands, an Cherry Gardens an Beverly Hills dem a skwat. Aaftar aal. If yu a skwat, yu mait az wel av ambishan.
Bot som a dem yuut a gwaan laik lego biis. Dem no av no biyievya. Ou dem fi out a yaad staak niekid ina di piipl dem gud-gud komyuuniti? Dat a pyuur slaknis. Out a out. Bot dem gaan faar out. Outa aada. Dem bai aan chrobl pan demself. Dem no nuo ou fi skwat. Dem afi smaal op demself so nobadi no nuotis dem tu dat. Dem tuu brait.
Stil far aal, wi kyaahn dash dem we an gwaan laik se dem no bilangz tu wi. Dem a smadi pikni, smadi breda, smadi onkl, smadi kosn, smadi pupa. Wi dis afi kliem dem. Dem a fambili. Dem a fi wi. An dem a Gad pikni. Siem laik Jesus. Dem a smadi.
- English Translation
I don’t mean laughing out loud. It’s the other kind of funny I’m talking about. What’s called ‘queer’ these days. What if Jesus was homosexual! Think about it. He never married. And he used to hang out with a lot of men. And, according to John’s account in the New Testament, Jesus had a special love for him. That’s what John said.
Some Bible scholars claim that it wasn’t only 12 disciples Jesus had. It was lots more. About 70! Jesus was like these DJs and their crew. Or those young men who go to parties in a big group and don’t dance with women at all. Just a whole bunch of them together. Jesus did have female friends. But some of them were quite disreputable. They were prostitutes.
Anyhow, I don’t want anyone to feel they need to pray for my soul. So let me spell it out: I’m not saying that Jesus was queer. It’s a question I’m asking. And I’m not the only one to raise the issue. I googled ‘Was Jesus a homosexual?’ and I was shocked to see that 11,300,000 responses came up in 0.28 seconds. Faster than Usain Bolt!
So let me tell you why I ‘m asking this funny question. You see those parsons who are stirring up their congregation against homosexuals and holding demonstrations in the streets against those activists who are trying to change the buggery law! I don’t know what those parsons would do if they found out that Jesus was homosexual. They would have to commit suicide.
Or they could start taking Matthew 7:12 seriously and try to treat others the way they’d like to be treated. And they would have to come off their high horse and remember that they are sinners. Some of these parsons commit adultery and because they’re having sex with women they pretend as if their sin is better than other people’s. Sin is sin.
FROM PILLAR TO POST
And I want to know what these parsons are saying and doing about the youth who are wandering around from pillar to post, unable to find a home. I’m sorry for them. They’ve been driven from uptown and they can’t go back downtown. But these youths have high standards! Its in Millsborough, and Seymour Lands, and Cherry Gardens and Beverly Hills that they’re squatting. After all. If you’re going to squat, you might as well be ambitious.
But some of these youths are behaving like wild animals. They have no sense of decency. How can they be outdoors stark naked in respectable communities? That’s pure vulgarity. Coming out of the closet is one thing. But they have gone far out. Out of order. They are making trouble for themselves. They don’t know how to squat. You have to be discreet so that you’re hardly noticed. They are too outrageous.
All the same, we can’t distance ourselves and act as if they don’t belong to us. They are somebody’s child, somebody’s brother, somebody’s uncle, somebody’s cousin, somebody’s father. We have to claim them. They’re family. They are ours. And they are God’s children. Just like Jesus. They are human.