Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.
Wat a way certain people a run down Sista P fi call election! A wa mek? Ascorden to Constitution, election no ha fi call so till way down a April. 2017! Di way me seet, since Sista P never call election last year, she might as well tek her time decide her mind.
Dem a throw word pon Sista P seh she no know weh she a do. She dis a wait-wait an dem no know a wa she a wait fa. She mek dem know seh she a wait pon God. An a it mek dem a tek her mek poppyshow. If plenty a dem odder politician did wait pon God fi tell dem weh fi do, tings mighta plenty better fi wi. It look like a devil a tell some a dem weh fi do.
Suppose Sista P have big plan weh she naa tell nobody? Member seh a February 26, 2006 she beat out Peter Phillips fi turn leader a di PNP. Mi wonder if Sista P a consider fi step down after 10 year. If she do dat, PNP ha fi pick a new leader fi carry di party go eena election. An dat a go tek lickle time.
Sista P no gi mi no message fi gi unu. An God no reveal nutten to mi. Mi a no no prophet. Mi dis a wonder. An all me know, Sista P no ha fi fret bout fi her legacy. It safe. Di first woman fi turn prime minister eena Jamaica! Dat kuda never easy. An all who like gwaan like seh Sista P a eedyat, mek mi aks dem a who a di eedyat dem weh mek her turn prime minister?
DEM TOO RENK
Den mi can just see di runjostling fi tek over from Sista P. Di best candidate me tink, a di said same Peter Phillips weh Sista P did dust out fi turn party leader. Im have sense an im work hard. An it no easy fi deal wid IMF an ha fi a carry pure bad news come gi wi. Well lickle good news to. But not to dat. Fi wi dollar pop down. An it look like seh it naa go ketch up itself fi now.
If Sista P gi up di prime minister work, she have nuff tings weh she can do. Di first ting mi wuda like see her do a fi write one book bout her life. No ongle wa deh pon Wikipedia. Bill an receipt. She can get one duppy writer fi help her write di book. An she no ha fi shame fi get help. Nuff cebrelity wid book, a duppy write di book.
An wen di book come out, Sista P can go lecture all bout. A yard an abroad. Michael Manley dweet. P.J. Patterson same way. Eddie Seaga. Wen politician lef office, dem no ha fi siddung a dem yard naa do nutten. Sista P have fi her Portia Simpson Miller Foundation weh set up eena 2010. She can gwaan divel it up.
Sista P no fi mek none a di man dem shub her out a office. Dem too renk. A chruu she a woman mek dem a tek liberty wid her. Look how much old man deh eena Parliament! Anybody a tell dem fi go a dem yard? An Sista P stronger an dem. Mek dem wait! God wi tell Sista P when a di right time fi fly di gate. Time longer than rope.
Wat a wie sortn piipl a ron dong Sista P fi kaal ilekshan! A wa mek? Azkaadn tu kanstityuushan, ilekshan no a fi kaal so til wie dong a Iepril. 2017! Di wie mii siit, sins Sista P neva kaal ilekshan laas ier, shi mait az wel tek ar taim disaid ar main.
Dem a chruo wod pan Sista P se shi no nuo we shi a du. Shi dis a wiet-wiet an dem no nuo a wa shi a wiet fa. Shi mek dem nuo se shi a wiet pan Gad. An a it mek dem a tek ar mek papishuo. If plenti a dem ada palitishan dem did wiet pan Gad fi tel dem we fi du, tingz maita plenti beta fi wi. It luk laik a debl a tel som a dem we fi du.
Supuoz Sista P av big plan we shi naa tel nobadi? Memba se a Febieri 26, 2006 shi biit out Peter Phillips fi ton liida a di PNP. Mi wanda if Sista P a kansida fi step dong aafta 10 ier. If shi du dat, PNP a fi pik a nyuu liida fi kyari di paati go iina ilekshan. An dat a go tek likl taim.
Sista P no gi mi no mechiz fi gi unu. An Gad no riviil notn tu mi. Mi a no no prafit. Mi dis a wanda. An aal mii nuo, Sista P no a fi fret bout fi ar legisi. It sief. Di fos uman fi ton praim minista iina Jamieka! Dat kuda neva iizi. An aal uu laik gwaan laik se Sista P a iidyat, mek mi aks dem a uu a di iidyat dem we mek ar ton praim minista?
DEM TUU RENGK
Den mi kyahn jos si di ronjaslin fi tek uova fram Sista P. Di bes kyandidet mi tingk, a di sed siem Peter Phillips we Sista P did dos out fi ton paati liida. Im av sens an im wok aad. An it no iizi fi diil wid IMF an a fi a kyari pyuur bad nyuuz kom gi wi. Wel likl gud nyuuz tu. Bot nat tu dat. Fi wi dala pap dong. An it luk laik se it naa go kech op itself fi nou.
If Sista P gi op di praim minista wok, shi av nof ting we shi kyahn du. Di fos ting mi wuda laik si ar du a fi rait wan buk bout ar laif. No ongl wa de pan Wikipedia. Bil an risiit. Shi kyahn get wan dopi raita fi elp ar rait di buk. An shi no a fi shiem fi get elp. Nof sibreliti wid buk, a dopi rait di buk.
An wen di buk kom out, Sista P kyahn go lekcha aal bout. A yaad an abraad. Michael Manley dwiit. PJ Patterson siem wie. Eddie Seaga. Wen palitshan lef afis, dem no a fi sidong a dem yaad naa du notn. Sista P av fi ar Portia Simpson Miller Foundation we set op iina 2010. Shi kyahn gwaan divel it op.
Sista P no fi mek non a di man dem shub ar out a afis. Dem tuu renk. A chruu shi a uman mek dem a tek libati wid ar. Luk omoch uol man de iina Paaliment! Enibadi a tel dem fi go a dem yaad? An Sista P chranga an dem. Mek dem wiet! Gad wi tel Sista P wen a di rait taim fi flai di giet. Taim langa dan ruop.
LET SISTER P TAKE HER TIME!
Just look at how certain people are trying to force Sister P to call elections! Why? According to the Constitution, elections don’t have to be called until way down in April. 2017! The way I see it, since Sister P didn’t announce the date last year, she might as well take her time to make a decision.
They are undermining Sister P, claiming that she doesn’t know what she’s doing. She’s just waiting, waiting and they don’t know what she’s waiting on. She let them know she’s waiting on God. And now they’re taking her for a joke. If a lot of those other politicians would wait on God to tell them what to do, things might be much better for us. It looks as if it’s the devil that’s telling some of them what to do.
What if Sister P has big plans she’s not telling anybody? Remember that is was on February 26, 2006 that she beat Peter Phillips to become leader of the PNP. I’m wonder if Sister P is considering stepping down after 10 years. If she does, the PNP would have to pick a new leader to take the party into elections. And that’s going to take time.
Sister P hasn’t given me any message to deliver. And God hasn’t revealed anything to me. I’m not a prophet. I’m just wondering. What I do know is that Sister P doesn’t have to be concerned about her legacy. It’s safe. The first woman to become prime minister of Jamaica! That could never have been easy. And as for all those who like to insist that Sister P is an idiot, let me ask them who are the idiots who made her prime minister?
THEY ARE TOO RUDE
Then I can just see the infighting to decide who is going to replace Sista P. I think the best candidate is the same Peter Phillips Sister P defeated to become party leader. He’s sensible and hard-working. And it’s not easy to deal with IMF and have to bring us only bad news. Well, a little good news too. But not so much. Our dollar has collapsed. And it doesn’t seem as if it’s going to recover any time soon.
If Sister P gives up the job as prime minister, there are lots of other things she can do. I think her first project should be writing her autobiography. Not just what’s on Wikipedia. But the whole bill and receipt. She can employ a ghost writer. And she doesn’t have to be ashamed of getting help. The books of many celebrities are written by ghosts.
And when the book is published, Sister P can do lecture tours all over. At home and abroad. Michael Manley did it. P.J. Patterson as well. And Eddie Seaga. When politicians leave office, they don’t have to sit idly at home. Sister P has her Portia Simpson Miller Foundation that was set up in 2010. She can continue to develop it.
Sister P shouldn’t make any of those men force her out of office. They are too rude. It’s because she’s a woman, that’s why they are are taking liberties with her. There are so many old men in Parliament! Is anybody telling them to go home? And Sister P is fitter than them. Let them wait! God will tell Sister P when it’s the right time to make the call. All things in their time!