Wa Mek di Prime Minister a Bow To di Queen?

Two spelling systems are used for the Jamaican language below. The first, which I call ‘Chaka-Chaka’, is based on English spelling. The second, ‘Prapa-Prapa’, is the specialist system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.

CHAKA-CHAKA SPELLING

Long time now fi wi two political party dem a talk-talk bout seh di Queen a England fi stop rule fi wi country. Di politician dem know seh wi a form fool a gwaan like seh wi independent fi true. Di said same Queen weh gi wi independence a rule wi same way. Wa kind a independence dat? A joke ting! See one video ya bout independence inna 1962. Last week, di Independent newspaper inna England publish one report bout di shituation, as Peter Tosh im woulda seh. If di politician dem serious, dem ha fi call referendum an mek di whole a wi inna Jamaica decide wi mind if wi want Missis Queen fi gwaan rule wi. A time fi stop talk.

Hear weh Portia Simpson Miller she did seh inna 2012: “I love the queen; she is a beautiful lady and apart from being a beautiful lady, she is a wise lady and a wonderful lady. But I think the time come. As we celebrate our achievements as an independent nation, we now need to complete the circle of independence.” Pure talk! Di People’s National Party never do nutten bout di Queen.

Ascorden to one BBC news report weh come out pon January 6, 2012, dis a wa di head a fi wi country inna England seh bout Sista P big chat: “In response, a Buckingham Palace spokesman said ‘the issue of the Jamaican head of state was entirely a matter for the Jamaican government and people.’” Buckingham Palace tek wi mek poppyshow. Dem know seh fi wi politician dem no serious.

Inna 2016, di Jamaica Labour Party mek big announcement seh dem a go a Parliament wid one bill fi change di Constitution. Dem a go get rid a di Queen an fi her Governor-General. And dem a go bring een one president. Inna fi im ‘Throne Speech’ weh did open Parliament inna 2016, Governor-General Sir Patrick Allen announce di govament plan. Di best joke: dem a go redundant im. All now, govament nuh do nutten bout change Constitution.

PIT TOILET

Mi nuh understand wa mek Andrew Holness agree fi turn privy councillor. Dis a di first sentence a di oath weh all a di privy councillor dem ha fi tek: “You do swear by Almighty God to be a true and faithful Servant unto the Queen’s Majesty, as one of Her Majesty’s Privy Council.” Inna dis ya time, wen di two political party dem claims seh Jamaica ha fi get rid a di Queen, di prime minister im a go tek oath fi turn servant fi Missis Queen?

See one next part a di oath weh di privy councillor dem ha fi tek: “and will keep secret all Matters committed and revealed unto you, or that shall be treated of secretly in Council.” Di Privy Council come een like lodge. Top secret. Dat a wa di adjective ‘privy’ mean. It come from Latin ‘privatus.’ Private and personal.

Privy have one next meaning. Di noun! Ascorden to Wiktionary: “An outdoor facility for urination and defecation, whether open (latrine) or enclosed (outhouse).” Pit toilet! Missis Queen privy no pretty. An fi wi prime minister better mind sharp how im bow to Missis Queen. All kind a matter weh im nuh want might a drop pon im head.

PRAPA-PRAPA SPELIN

Lang taim nou fi wi tuu politikal paati dem a taak-taak bout se di Kwiin a Ingglan fi stap ruul fi wi konchri. Di palitishan dem nuo se wi a faam fuul a gwaan laik se wi independent fi chruu. Di sed siem Kwiin we gi wi indipendens a ruul wi siem wie. Wa kain a indipendens dat? A juok ting! Si wan vidya ya bout indipendens ina 1962. Laas wiik, di Independent nyuuzpiepa ina Ingglan poblish wan ripuot bout di shityuieshan, az Peter Tosh im wuda seh. If di palitishan dem siiryos, dem a fi kaal refarendom an mek di uol a wi ina Jamieka disaid wi main if wi waan Misis Kwiin fi gwaan ruul wi. A taim fi stap taak.

Ier we Portia Simpson Miller shii did se ina 2012: “I love the queen; she is a beautiful lady and apart from being a beautiful lady, she is a wise lady and a wonderful lady. But I think the time come. As we celebrate our achievements as an independent nation, we now need to complete the circle of independence.” Pyuur taak! Di People’s National Party neva du notn bout di Kwiin.

Azkaadn tu wan BBC nyuuz ripuort we kom out pan Janieri 6, 2012, dis a wa di ed a fi wi konchri ina Ingglan se bout Sista P big chat: “In response, a Buckingham Palace spokesman said ‘the issue of the Jamaican head of state was entirely a matter for the Jamaican government and people.’” Buckingham Palace tek wi mek papishuo. Dem nuo se fi wi palitishan dem no siiryos.

Ina 2016, di Jamaica Labour Party mek big anounsment se dem a go a Paaliment wid wan bil fi chienj di Kanstityuushan. Dem a go get rid a di Kwiin an fi ar Govana-Jinaral. And dem a go bring iin wan prezident. Ina fi im ‘Throne Speech’ we did opn Paaliment ina 2016, Govana-Jinaral Sir Patrick Allen anouns di govament plan. Di bes juok: dem a go ridondant im. Aal nou, govament no du notn bout chienj Kanstityuushan.

PIT TAILIT

Mi no andastan wa mek Andrew Holness agrii fi ton privi kounsla. Dis a di fos sentens a di uot we aal a di privi kounsla dem a fi tek: “You do swear by Almighty God to be a true and faithful Servant unto the Queen’s Majesty, as one of Her Majesty’s Privy Council.” Ina dis ya taim, wen di tuu politikal paati dem kliemz se Jamieka a fi get rid a di Kwiin, di praim minista im a go tek uot fi ton sorvant fi Misis Kwiin?

Si wan neks paat a di uot we di privi kounsla dem a fi tek: “and will keep secret all Matters committed and revealed unto you, or that shall be treated of secretly in Council.” Di Privi Kounsl kom iin laik laj. Tap siikrit. Dat a wa di ajiktiv ‘privi’ miin. It kom fram Latin ‘privatus.’ Pravit an porsnal.

Privi av wan neks miinin. Di noun! Azkaadn tu Wiktionary: “An outdoor facility for urination and defecation, whether open (latrine) or enclosed (outhouse).” Pit tailit! Misis Kwiin privi no priti. An fi wi praim minista beta main shaap ou im bou tu Misis Kwiin. Aal kain a mata we im no waahn maita jrap pan im ed.

LACHRIIN WASH WE INA BIG RIEN INA JAMIEKA INA 1975

ENGLISH TRANSLATION

WHY IS THE PRIME MINISTER BOWING TO THE QUEEN?

For quite a long time, both political parties have been saying that it’s time for the Queen of England to no longer be Jamaica’s head of state. The politicians know we’re forming the fool pretending that we are truly independent. The very Queen who gave us independence is ruling us just the same. What kind of independence is that? It’s a joke! Here’s a video about independence in 1962. Last week, the Independent newspaper in England published a report bout the shituation, as Peter Tosh would say. If the politicians are really serious, they should call a referendum and let all Jamaicans make up our collective mind about whether or not we want the Queen to be continue ruling us. It’s time to stop all the talk.

Here’s what Portia Simpson Miller said in 2012: “I love the queen; she is a beautiful lady and apart from being a beautiful lady, she is a wise lady and a wonderful lady. But I think the time come. As we celebrate our achievements as an independent nation, we now need to complete the circle of independence.” Idle chatter! The People’s National Party did nothing about the Queen.

According to a BBC news report which came out on January 6, 2012, this is what the head of state of our country in England said about Sista P’s big talk: “In response, a Buckingham Palace spokesman said ‘the issue of the Jamaican head of state was entirely a matter for the Jamaican government and people.’” Buckingham Palace treated us like a big joke. They know our politicians aren’t serious.

In 2016, the Jamaica Labour Party made a big announcement that they were going to table a bill in Parliament to change the Constitution. They were going to get rid of the Queen and her Governor-General. And they were going to install a president. In his ‘Throne Speech’ which opened Parliament in 2016, Governor-General Sir Patrick Allen announced the government’s plan. The best joke: he was going to become redundant. Up to now, the government has done nothing about changing the Constitution.

PIT TOILET

I just don’t understand why Andrew Holness agreed to become a privy councillor. Here’s the first sentence of the oath that all privy councillors must take: “You do swear by Almighty God to be a true and faithful Servant unto the Queen’s Majesty, as one of Her Majesty’s Privy Council.” In this day and age, when both political parties claim that Jamaica must get rid of the Queen, the prime minister swore to become a servant of the Queen?

Here’s another aspect of the oath that the privy councillors have to take: “and will keep secret all Matters committed and revealed unto you, or that shall be treated of secretly in Council.” Di Privy Council is like a lodge. Top secret. That’s what the adjective ‘privy’ means. It comes from Latin ‘privatus.’ Private and personal.

Privy has another meaning. Di noun! According to Wiktionary: “An outdoor facility for urination and defecation, whether open (latrine) or enclosed (outhouse).” Pit toilet! The Queen’s privy is not pretty. And our prime minister had better be very careful about how he bows to the Queen. All kinds of matter that he doesn’t want might drop on his head.

LATRINE IN AMSTERDAM

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

Up ↑

%d bloggers like this: