Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist phonetic system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.
Look how long woman a run church a Jamaica! An it tek two thousand year an more fi di Anglican dem inna England decide dem mind fi mek woman turn bishop. Wat a sinting! An some a di man dem – an all woman too – bex, bex, bex.
Di bishop dem claims seh dem a tan up inna one long, long line weh go right back to Jesus an im twelve disciple. From man to man come down. Dem call it ‘apostolic succession’. Dem seh Jesus never have no woman disciple. A so-so man. So a man fi run tings ina di church. Woman no business fi waan turn no bishop. Unu tink it easy?
Di Anglican church do have woman bishop inna odder country laka Australia, New Zealand, Canada, Merica an Swaziland. But no inna England. Dem a hold on pon ole-time sinting. Some a di man priest dem so harden, dem seh if a no man bishop ordain dem, dem no ordain fi true. Wat a way dem backward! Mi sorry fi dem.
Tings an times a change. An all who naa change a go get lef. Anyhow, it look like seh di one dem weh waan bring een di woman bishop dem a try see wid dem odder one weh no ready. Dem no waan di church mash up. So hear wa dem a go do. All who no waan no woman bishop can aks fi one man.
Mi no know how dem a go manage if half a dem waan man an di next half waan woman. Dem mussi a go end up wid two bishop inna di one district weh dem call ‘diocese’. Then mek mi gi unu lickle joke. Di word bishop come from Greek: episkopos. Di epi part mean pon top; an skopos mean fi look. So bishop a overseer.
See ya! We done know bout overseer. Not a nice sinting fi a beat people fi work out dem soul case fi nutten. But dem ya holy-holy overseer supposen fi a look after wi soul an wi soul case. So wat happen to woman soul an soul case? Wi a no smaddy? Wa mek wi cyaan oversee fi wi owna soul an case? An fi di man dem to? Wa mek a ongle man can oversee?
Then through di Anglican church a di official church a England, di woman-bishop vote ha fi go a Parliament. An if it pass deh so, then di woman dem gone clear. An member seh it never easy fi woman turn priest. A no til 1994 dem ordain di first woman priest dem. Mi no understand wa mek it so hard fi Christian see seh man an woman supposen fi have di said same rights.
Old-time people seh, ‘woman luck deh a dungle heap; fowl cratch i out’. Dat simple mean seh good luck can drop pon woman anywhere. All inna dungle. Mi naa seh Anglican church a dungle. Mi no waan no overseer beat out mi soul case. But it look like seh nuff cratch-cratch a gwaan inna dat deh chuch fi root out some a di man dem an mek space fi woman. After all!
Luk ou lang uman a ron choch a Jamieka! An it tek tuu touzn ier an muor fi di Anglikan dem ina Inglan disaid dem main fi mek uman ton bishop. Wat a sinting! An som a di man dem – an aal uman tu – beks, beks, beks.
Di bishop dem kliemz se dem a tan op ina wan lang, lang lain we go rait bak tu Jiizas an im twelv disaipl. Fram man tu man kom dong. Dem kaal it ‘apostolic succession’. Dem se Jiizas neva av no uman disaipl. A suo-so man. So a man fi ron tingz ina di choch. Uman no bizniz fi waahn ton no bishop. Unu tingk it iizi?
Di Anglikan choch duu av uman bishop ina som ada konchri laka Aaschrielya, Nyuu Ziilan, Kyanada, Merika an Swaazilan. Bot no ina Inglan. Dem a uol aan pan uol-taim sinting. Som a di man priis dem so aadn, dem se if a no man bishop aadien dem, dem no aadien fi chruu. Wat a wie dem bakwod! Mi sari fi dem.
Tingz an taimz a chienj. An aal uu naa chienj a go get lef. Eni-ou it luk laik se di wan dem we waahn bring iin di uman bishop dem a chrai si wid dem ada wan we no redi. Dem no waahn di choch mash op. So ier wa dem a go du. Aal uu no waahn no uman bishop kyan aks fi wan man.
Mi no nuo ou dem a go manij ef aaf a dem waahn man an di neks aaf waahn uman. Dem mosi a go en op wid tuu bishop ina di wan dischrik we dem kaal ‘diocese’. Den mek mi gi unu likl juok. Di wod bishop kom fram Griik: episkopos. Di epi paat miin pan tap; an skopos miin fi luk. So bishop a uovasiya!
Si ya! Wii don nuo bout uovasiya. Nat a nais sinting fi a biit piipl fi wok out dem suol kies fi notn. Bot dem ya uoli-uoli uovasiya sopuozn fi a luk aafta wi suol an wi suol kies. So wat apn tu uman suol an suol kies? Wi a no smadi? Wa mek wi kyaahn uovasi fi wi uona suol an kies? An fi di man dem tu? Wa mek a ongl man kyan uovasi?
Den chruu di Anglikan choch a di ofishal choch a Inglan, di uman-bishop vuot a fi go a Paaliment. An if it paas de so, den di uman dem gaan klier. An memba se it neva iizi fi uman ton priis. A no til 1994 dem aadien di fos uman priis dem. Mi no andastan wa mek it so aad fi Krischan si se man an uman supuozn fi av di sed siem raits.
Uol-taim piipl se, ‘uman lok de a dongl iip; foul krach i out’. Dat simpl miin se gud lok kyan jrap pan uman eniwe. Aal ina dongl. Mi naa se Anglikan choch a dongl. Mi no waahn no uovasiya biit out mi soul kies. Bot it luk laik se nof krach-krach a gwaan ina dat de choch fi ruut out som a di man dem an mek spies fi uman. Aafta raal!
We’ve had women in charge of churches in Jamaica for so long! And it has taken more than two thousand years for the Anglicans in England to agree that women can be bishops. What a thing! And some men – and even women, too – are quite angry.
The bishops claim that their authority was established with Jesus and his twelve disciples. From man to man right down the line. They call it ‘apostolic succession’. They say Jesus did not have any female disciples. Only men. So it is men who must be leaders of the church. Women should not even want to be bishops. Can you believe it?
The Anglican church does have female bishops in some other countries such as Australia, New Zealand, Canada, the U.S. and Swaziland. But not in England. They are hanging on to tradition. Some of the male priests are so stubborn they argue that if they are not ordained by a male bishop, their priesthood is not legitimate. They are so backward! Too bad for them.
Things and times are changing. And all those who don’t want to change are going to be left behind. Anyhow, it seems as if those who support the proposal to make women bishops are trying to compromise with those who don’t. They don’t want the church to break up. So this is what they’ve decided to do. Those congregations that don’t want a female bishop can request a male.
I don’t know how they’re going to manage if half of them want a man and the other half want a woman. They’re going to end up with two bishops in one diocese, as they call the district for which a bishop is responsible. Then this is so funny. The word bishop comes from Greek: episkopos. Epi means above; and skopos means looking. So a bishop is an overseer!
Look here! We do know about this overseer business. It’s not a nice thing to have to beat people to exhaustion, body and soul, forcing them to work for nothing. But these sanctified overseers are supposed to look after both body and soul. So what’s the story with woman’s soul and body? Aren’t we human? Why can’t we overseer our own soul and body? And the men’s as well? Why is it that only men can be overseers?
Then because the Anglican church is the official church of England, the issue of female bishops has to be put to the vote in Parliament. And if it passes there, then the women would be free to take up office. And, remember, it wasn’t easy for women to become priests. It wasn’t until 1994 that the first female priest was ordained. I don’t understand why it’s so hard for Christians to accept that men and woman are supposed to have equal rights.
Traditional wisdom declares, ‘woman’s luck is in the garbage heap; the fowl scratches it out’. That simply means good fortune can fall on woman anywhere. Even in the dump. I’m not saying that the Anglican church is a dump. I don’t want to be beaten by any overseer. But it seems as if a lot of digging up is being done in that church to uproot some of the men and make space for women. After all!