Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.
It look like seh Garfield Sinclair lik im head. Im a di man in charge a FLOW Jamaica. Im no see seh di bigger boss dem fi Liberty Global, weh own FLOW, a gi im basket fi carry water? Seh dem waan mek more money offa wi. Di amount a customer weh a bawl bout FLOW bad service! An Liberty Global coulda a set fi wi, a plan fi raise price? No sah! Nutten couldn’t go so.
Mek mi tek dat back. Nutten shouldn’t go so. But dem have di handle an wi have di blade. So dem can do anyting dem waan. An nobody cyaan do nutten bout it. Yes, wi can switch to Digicel. Ih-ih? Oonu no hear seh Digicel owe so much money dem a look money fi borrow fi pay off di money dem owe? Debt top a debt. Digicel cyaan help demself, much more wi. Dem a raise fi dem price to. Watch out! No better pork; no better barrel.
Mi waan know wa Office of Utilities Regulation (OUR) a do bout FLOW an Digicel. An by di way, mi no work fi OUR. Mi tired fi people a email mi a complain bout FLOW an Digicel. All mi can do a write bout it. Oonu fi email OUR. An call dem. An carry on bad. Oonu fi go demonstrate outside a OUR office. Mek dem know seh oonu serious. Oonu waan justice!
Hear wa smaddy email an tell mi last week. Im seh FLOW gi im bout 2 week notice seh dem a go raise dem phone rate from $2.99 to $3.99. Digicel gi im 2 day notice seh dem a go raise fi dem rate from $2.95 to $3.95. Oonu see seh FLOW an Digicel a sing di same Sankey!
MI NO SORRY FI DEM
Den ascorden to one Gleaner article weh publish pon May 17, ‘FLOW Jamaica hikes cable rates amid losses’. FLOW lost 533 million dollar fi di first three month a disya year. Mi no know a weh dem go put down dat deh whole heap a money careless mek dem go lost di whole a it. Mi no sorry fi dem. A wi mi sorry fa. FLOW a depend pon wi fi gi dem back all a di money weh dem lost. Anyting coulda go so? A no wi response.
Mek mi tell oonu bout fi mi FLOW cable service. Mi cyaan even get TVJ! Most a di programme dem mi waan watch off di air. Yu see all Stephen Colbert show. Dat a one wicked comedy show. A pure politics im deal wid. When im done wid di poppyshow weh a gwaan eena Merica, yu weak. Talk bout tek bad tings mek joke! Dat deh channel, 123, gawn. Mi ha fi a wait so til next morning fi ketch Colbert pon di Internet.
An a no like seh FLOW a cut dem price fi mek up fi all a di channel dem weh gawn. Dem a raise di price. Dem no ha no conscience. John Crow nyam it out. So now, wi ha fi go pay more fi less? If FLOW tink seh dem a lost money now, mek dem wait so til wi go pon strike an stop buy dem bandooloo cable service. A den dem a go lost money. Mi can get TVJ fi nutten. Mek FLOW gweh! Garry Sinclair better tell di higher heads seh wi tired a di advantage tecking. FLOW ha fi do better dan dis. Or wi go a block dem up!
It luk laik se Garfield Sinclair lik im ed. Im a di man in chaaj a FLOW Jamaica. Im no si se di biga baas dem fi Liberty Global, we uon FLOW, a gi im baaskit fi kyari waata? Se dem waahn mek muor moni aafa wi. Di amount a kostama we a baal bout FLOW bad sorvis! An Liberty Global kuda a set fi wi, a plan fi riez prais? Nuo sa! Notn kudn go so.
Mek mi tek dat bak. Notn shudn go so. Bot dem av di angl an wi av di blied. So dem kyahn du eniting dem waahn. An nobadi kyaahn du notn bout it. Yes, wi kyahn swich tu Digicel. Ihn-ihn? Unu no ier se Digicel uo so moch moni, dem a luk moni fi bara fi pie aaf di moni dem uo? Det tap a det. Digicel kyaahn elp demself, moch muor wi. Dem a riez fi dem prais tu. Wach out! No beta puok; no beta baril.
Mi waahn nuo wa Office of Utilities Regulation (OUR) a du bout FLOW an Digicel. An bai di wie, mi no wok fi di OUR. Mi taiyad fi piipl a iimiel mi a komplien bout FLOW an Digicel. Aal mi kyahn du a rait bout it. Unu fi iimiel OUR. An kaal dem. An kyari aan bad. Unu fi go demanschriet outsaid a OUR afis. Mek dem nuo se unu siiriyos. Unu waahn jostis!
Ier wa smadi iimiel an tel mi laas wiik. Im se FLOW gi im bout 2 wiik notis se dem a go riez dem fuon riet from $2.99 to $3.99. Digicel gi im 2 die notis se dem a go riez fi dem riet fram $2.95 tu $3.95. Unu si se FLOW an Digicel a sing di siem Sankey!
MI NO SARI FI DEM
Den azkaadn tu wan Gleaner aatikl we poblish pan Mie 17, ‘FLOW Jamaica hikes cable rates amid losses’. FLOW laas 533 milyan dala fi di fos chrii mont a disya ier. Mi no nuo a we dem go put dong dat de uol iip a moni kielis mek dem go laas di uol a it. Mi no sari fi dem. A wi mi sari fa. FLOW a dipen pan wi fi gi dem bak aal a di moni we dem laas. Enting kuda go so? A no wi rispans.
Mek mi tel unu bout fi mi FLOW kiebl sorvis. Mi kyaahn iivn get TVJ! Muos a di pruogram dem mi waahn wach aaf di ier. Yu si aal Stephen Colbert shuo. Dat a wan wikid kamidi shuo. A pyuur palitiks im diil wid. Wen im don wid di papishuo we a gwaahn iina Merika, yu wiik. Taak bout tek bad tings mek juok! Dat de chanel, 123, gaan. Mi a fi a wiet so til neks maanin fi kech Colbert shuo pan di Intanet.
An a no laik se FLOW a kot dem prais fi mek op fi aal a di chanel dem we gaan. Dem a riez di prais. Dem no a no kanshens. Jangkro nyam it out. So nou, wi a fi go pie muor fi les? If FLOW tingk se dem a laas moni nou, mek dem wiet so til wi go pan schraik an stap bai dem banduulu kiebl sorvis. A den dem a go laas moni. Mi kyan get TVJ fi notn. Mek FLOW gwe! Garry Sinclair beta tel di aiya edz se wi taiyad a di advaantij tekin. FLOW a fi du beta dan dis. Aar wi a go blak dem op!
FLOW Has Nerve To Raise Prices
It seems as if Garfield Sinclair isn’t thinking straight. He’s the man in charge of FLOW Jamaica. Can’t he see that his superiors at Liberty Global, who own FLOW, are asking him to do the impossible? Insisting that they want to make more off us. There are so many customers complaining about FLOW’s bad service! And Liberty Global could actually be targetting us for a price increase? No sir! That simply couldn’t be true.
Let me take that back. That shouldn’t be true. But they have the handle and we have the blade. So they can do whatever they want. An nobody can do a thing about it. Yes, we can switch to Digicel. Really? Haven’t you heard that Digicel is so deep in debt they’re trying to borrow more money to pay off their debts? Debt on top of debt. Digicel can’t help themselves, let alone us. They are raising prices too. Watch out! We’re stuck between the devil and the deep blue sea.
I’d like to know what the Office of Utilities Regulation (OUR) is doing bout FLOW and Digicel. And by the way, I don’t work for the OUR. I’m tired of getting emails complaining about FLOW and Digicel. All I can do is write about it. You all have to email the OUR. And call them. And make a lot of noise. And demonstrate outside the OUR office. Let them know you’re serious. You want justice!
Here’s an email I got last week. The writer said FLOW gave him about 2 weeks notice that the phone rate was going to be raised from $2.99 to $3.99. Digicel gave him 2 days notice that their rate was going up from $2.95 to $3.95. You can see that FLOW and Digicel are singing the same tune!
I’M NOT SORRY FOR THEM
Then according to a Gleaner article published on May 17, ‘FLOW Jamaica hikes cable rates amid losses’. FLOW lost 533 million dollars in the first quarter of this year. I don’t know where they could have carelessly placed all that money so that they’ve lost all of it. I’m not sorry for them. I’m sorry for us. FLOW is depending on us to get back all the money they’ve lost. How can that be? We’re not responsible.
Let me tell you about my FLOW cable service. I can’t even get TVJ! Most of the programmes I want to watch are off the air. For example, the Stephen Colbert show. That’s a wicked comedy. He deals with just politics. When he’s done with all the nonsense that’s going on in the U.S, you’re weak. Talk about making fun of a bad situation! That channel, 123, gone. I have to wait until the next morning to catch Colbert on the Internet.
And FLOW isn’t giving price cuts to compensate for all the missing channels. They’re hiking prices. They have no conscience. It’s completely eaten away. So now, we have to pay more for less? If FLOW thinks they’re losing money now, let them wait until we go on strike and stop buying their erratic cable service. That’s when they’re going to lose money. I can get TVJ for free. Later for FLOW! Garry Sinclair had better tell his bosses that we’re tired of being exploited. FLOW has to do better than this. Or we’re going to block them up!