Never Mind Yaw, Novelette!

Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.

CHAKA-CHAKA SPELLING

No teck it personal, mi dear! Di man dem no ready. Dem no waan no woman commissioner. Dem no have di balls fi dat. It look like seh dem fraid woman a go put dem out a commission. Dem done know seh nuff time, di best ‘man’ fi di job a one woman. An it stick inna dem craw. Dem cyaan tek it. Wi gweh ha fi go wait one long long time fi one woman turn commissioner a police inna disya country.

Novlette-But yu set di pace an wi proud a yu. A no fi yu fault mek yu no get di work. Yu do everyting yu suppose fi do. Yu go a university. Yu study hard. Yu pass all a yu exam dem. Yu join police force becau yu know eena yu heart a heart seh yu can do di work. Yu understand di system. From top to bottom!

Ongle ting, yu never born wid no baton. Sake a dat, yu can form like seh yu a commissioner. Yu can act good-good. But dem nah gi yu di real-real commissioner work. Wat a piece a liberty! An plenty a di man dem weh born wid baton, dem cyaan do di work good like yu!

Dem tek woman fi eedyat! Dem tink seh dem can fool wi up. An wi no know wa a gwaan. Di lickle acting work nah hold wi. Wi done know how dat go. A consolation prize. A con dem a try con wi. Dem gi yu consolation before dem tek weh di big prize. Dat a after dem done build yu up, mek yu feel seh yu well qualify fi di work. If it fly go a yu head, yu all figet seh yu no got no nightstick. Yu start tink seh yu have a chance.

‘BET ON NOVELETTE’

All Gleaner get ketch! Pon February 19, dem publish one front-page story wid disya big-big headline, ‘Bet on Novelette – Acting police commissioner poised to be appointed to lead the force full-time’. A no Caymanas Park wi deh! Dis a no horse race. Dis a police work. Wi no ha fi a bet! Yu well qualify fi di job an yu suppose fi get it. Anyhow, hear wa smaddy tell Gleaner wid dem goat mouth:

“‘Ms Grant was appointed to act in the post but it appears that it was a test run and she has passed with flying colours,” one source told our news team.

“‘She has always enjoyed the respect of her colleagues, but in the time she has been acting she has convinced most persons that she has the mojo for the job.'”

mojo-header-logo-080310-dr

Well, Ms Novelette, yu mighta got ‘mojo’. Dat a one African word fi obeah. But still for all, yu no got no baton. An di way di ting set, fi yu obeah cyaan beat di man dem inna disya time. Dem got big stick over yu.

Mi glad fi si seh di woman organisation dem big yu up eena one letter weh Gleaner publish last week Tuesday: ‘Women laud Novelette Grant’. Dem seh, “As a woman who is one of the highest-ranking officers in a traditional male-dominated organisation, the JCF, yours is without a doubt a monumental achievement, and we hold you in the highest regard.”

A no ongle woman ‘laud’ yu, Ms Grant. Nuff man wid conscience know seh yu well deserve di commissioner work. Yu coulda more dan manage it. Never mind, yaw! Time longer dan rope.

PRAPA-PRAPA SPELIN

No tek it porsnal, mi dier! Di man dem no redi. Dem no waahn no uman komishana. Dem no av di baalz fi dat. It luk laik se dem fried uman a go put dem out a komishan. Dem don nuo se nof taim, di bes ‘man’ fi di jab a wan uman. An it stik ina dem kraa. Dem kyaahn tek it. Wi gwehn a fi go wiet wan lang-lang taim fi wan uman tun komishana a poliis ina disya konchri.

Bot yu set di pies an wi proud a yu. A no fi yu faalt mek yu no get di wok. Yu du evriting yu sopuoz fi du. Yu go a yuunivorsiti. Yu stodi aad. Yu paas aal a yu egzam dem. Yu jain poliis fuors bikaa yu nuo iina yu aat a aat se yu kyahn du di wok. Yu andastan di sistim. Fram tap tu batam!

Ongl ting, yu neva baahn wid no batan. Siek a dat, yu kyahn faam laik se yu a komishana. Yu kyahn ak gud-gud. Bot dem naa gi yu di riil-riil komishana wok. Wat a piis a libati! An plenti a di man dem we baahn wid batan, dem kyaahn du di wok gud laik yu!

Dem tek uman fi iidyat! Dem tingk se dem kyahn fuul wi op. An wi no nuo wa a gwaahn. Di likl aktin wok naa uol wi. Wi don nuo ou dat go. A kansolieshan praiz. A kan dem a chrai kan wi. Dem gi yu kansolieshan bifuor dem tek we di big praiz. Dat a aafta dem don bil yu op, mek yu fiil se yu wel kwalifai fi di wok. If it flai go a yu ed, yu aal figet se yu no gat no naitstik. Yu staat tingk se yu av a chaans.

‘BET ON NOVELETTE’

laughing-goat

Aal Gleaner get kech! Pan Febieri 19, dem poblish wan front-piej stuori wid disya big-big edlain, ‘Bet on Novelette – Acting police commissioner poised to be appointed to lead the force full time’. A no Caymanas Park wi de! Dis a no aas ries. Dis a polis wok. Wi no a fi a bet! Yu wel kwalifai fi di jab an yu supuoz fi get it. Eniou, ier wa smadi tel Gleaner wid dem guot mout:

“‘Ms Grant was appointed to act in the post but it appears that it was a test run and she has passed with flying colours,’ one source told our news team.

“‘She has always enjoyed the respect of her colleagues, but in the time she has been acting she has convinced most persons that she has the mojo for the job.'”

mojo+2Wel, Ms Novelette, yu maita gat ‘mojo’. Dat a wan Afrikan wod fi uobia. Bot stil far aal, yu no got no batan. An di wie di ting set, fi yu uobia kyaahn biit di man dem ina dis ya taim. Dem gat big stik uova yu.

Mi glad fi si se di uman aaganazieshan dem big yu op iiina wan leta we Gleaner poblish laas wiik Chuuzde: ‘Women laud Novelette Grant’.

Dem se, “As a woman who is one of the highest-ranking officers in a traditional male-dominated organisation, the JCF, yours is without a doubt a monumental achievement, and we hold you in the highest regard.”

A no ongl uman ‘laud’ yu, Ms Grant. Nof man wid kanshens nuo se yu wel disorv di komishana wok. Yu kuda muor dan manij it. Neva main, yaa! Taim langa dan ruop.

ENGLISH TRANSLATION

NEVER MIND, YOU HEAR, NOVELETTE!

Don’t take it personally, my dear! The men are just not ready. They don’t want a female commissioner. They don’t have the balls for it. It seems as if they’re afraid women are going to put them out of commission. They do know that lots of times, the best ‘man’ for the job is woman. And they can’t get over it. They just can’t deal with it. We’re going to have to wait a very long time for a woman to become the commissioner of police in this country.

But you set the pace and we’re proud of you. It’s not your fault you didn’t get the job. You did everything you were supposed to. You went to university. You studied hard. You passed all your exams. You joined the police force because you knew deep down that you were qualified to do the job. You understand the system. From top to bottom!

thThe only issue is you weren’t born with a baton. So you can pretend as if you’re a commissioner. You can act very well. But they’re not going to appoint you as commissioner. That’s just outrageous! And lots of the men who were born with a baton can’t do the job as well as you!

They think women are idiots! They think they can trick and we won’t know be any the wiser.  The acting job won’t cut it. We know what that’s about. It’s a consolation prize. They’re trying to con us. They gave you consolation before you lost the main prize. That’s after they sang your praises and made you think you were very well qualified for the job. If you made it go to your head, you would even forget that you don’t have a nightstick. You would start to think that you really stood a chance.

‘BET ON NOVELETTE’

Even the Gleaner was caught out! On February 19, they published a front-page story with this huge headline, ‘Bet on Novelette – Acting police commissioner poised to be appointed to lead the force full-time’. We’re not at Caymanas Park! This isn’t a horse race. It’s police work. We don’t have to be betting! You are well qualified for the job and and you’re supposed to get it. Anyhow, here’s what a source told the Gleaner, putting a jinx on you:

10-flying-colours-logo.jpg“‘Ms Grant was appointed to act in the post but it appears that it was a test run and she has passed with flying colours,” one source told our news team.

“‘She has always enjoyed the respect of her colleagues, but in the time she has been acting she has convinced most persons that she has the mojo for the job.'”

Well, Ms Novelette, you might have ‘mojo’. That’s an African word for obeah. All the same, you don’t have a baton. And the way things are, your obeah can’t beat the men in these times. They’ve got a big stick over you.

I’m glad that a coalition of women’s organisations honoured in a letter published by the  Gleaner on April 18: ‘Women laud Novelette Grant’.  They said, “As a woman who is one of the highest-ranking officers in a traditional male-dominated organisation, the JCF, yours is without a doubt a monumental achievement, and we hold you in the highest regard.”

It’s not only women who ‘laud’ you, Ms Grant. Many men of conscience know that you truly deserve the job of commissioner. You could have more than managed it. Never mind, you hear! All things in their time.