Two spelling systems are used for the Jamaican language below. The first, which I call ‘chaka-chaka’, is based on English spelling. The second, ‘prapa-prapa’, is the specialist phonetic system designed by the Jamaican linguist Frederic Cassidy. It has been updated by the Jamaican Language Unit at the University of the West Indies, Mona. After the two Jamaican versions, there’s an English translation.
Mi nah put goat mout pon Malcolm Gladwell. Not at all. Mi hope mosquito never bite im an gi im chik-V wen im come ya fi talk last week up a UWI. Im come fi help raise money fi di Sir John Golding Rehabilitation Centre. Dat deh centre did set up inna 1954 fi look after di whole heap a people dem weh did ketch polio. Di sickness tek Jamaica inna di July an 759 smaddy did get lik down; an 94 a dem dead.
Polio a one next virus laka chik-V. But a no mosquito spread it. Yu ketch it straight from one next smaddy. Mi know nuff a wi think seh a di said same ting wid chik-V. A no so-so mosquito. But di big-time scientist dem seh a no so. We done know bout science an science. But mek mi lef it.
Polio mash up yu nerves an bend yu up same time. Di good ting bout polio, dem have injection weh can protect yu. No injection no deh fi chik-V. An wen it tek yu, it hold on pon yu. Long time. An if any odder sinting wrong wid yu, chik-V mek it worserer. Yu can dead sake-a chik-V. Mi tink more an 94 a wi a go dead by di time chik-V done wid wi.
PITCH OVER YA SO
Malcolm Gladwell write one book weh im call The Tipping Point. Inna fi wi language, pitch over ya so. See di rest a di title: How Little Things Can Make a Big Difference. A true. Look how one lickle mosquito mash up so much a wi! Mi seh wi ha fi tek bad tings mek joke. Like how di lickle yute, Wayne J, sing bout ‘One Panadol’.
The Tipping Point a di first book Gladwell write weh come out inna 2000. An it sell off! A fi him ‘tipping point’ dat. Di book pitch Gladwell over mek im a roll inna money. Nuff, nuff money. Mi glad fi him. Him a one a wi. Him mother born right ya so. An him father from England know good woman.
Hear how Gladwell explain himself: “The tipping point is that magic moment when an idea, trend, or social behaviour crosses a threshold, tips, and spreads like wildfire. Just as a single sick person can start an epidemic of the flu, so, too, can a small but precisely targeted push cause a fashion trend, the popularity of a new product, or a drop in the crime rate.”
Gladwell tek di science bout how sickness spread all bout an divel it up. Him show wi how sopn good can spread same way. Me tink seh right now, Jamaica ready fi pitch over. Chiv-V mek wi see seh wi ha fi clean up di country. An a no ongle dutty wata mi mean. By di way, di chik-V mosquito love clean wata.
Inna him lecture, Gladwell seh wi ha fi rispek one anodder an trust one anodder. Wi ha fi mek everybody inna Jamaica know seh di whole a wi a smaddy. An me seh if it tek chik-V fi force wi fi see seh wi can’t gwaan so careless bout evriting inna Jamaica, dat a fi wi ‘Tipping Point’ fi true.
Mi naa put guot mout pan Malcolm Gladwell. Nat at aal. Mi uop maskita neva bait im an gi im chik-V wen im kom ya fi taak laas wiik op a UWI. Im kom fi elp ries moni fi di Sir John Golding Rehabilitation Centre. Dat de centre did set op ina 1954 fi luk aafta di uol iip a piipl dem we did kech puolyo. Di siknis tek Jamieka iina di Juulai an sevn ondred an fifti nain smadi did get lik dong; an nainti fuor a dem ded.
Puolyo a wan neks vairus laka chik-V. Bot a no maskita spred it. Yu kech it chriet fram wan neks smadi. Mi nuo nof a wi tingk se a di sed siem ting wid chik-V. A no suoso maskita. Bot di big-taim saiyantis dem se a no so. Wi don nuo bout saiyans an saiyans. Bot mek mi lef it.
Puolyo mash op yu norz an ben yu op siem taim. Di gud ting bout puolyo, dem av injekshan we kyan protek yu. No injekshan no de fi chik-V. An wen it tek yu, it uol aan pan yu. Lang taim. An if eni ada sinting rang wid yu, chik-V mek it wosara. Yu kyan ded siek a chik-V. Mi tingk muor an nainti fuor a wi a go ded bai di taim chik-V don wid wi.
PICH UOVA YA SO
Malcolm Gladwell rait wan buk we im kaal The Tipping Point. Ina fi wi langgwij, pich uova ya so. Si di res a di taikl: How Little Things Can Make a Big Difference. A chruu. Luk ou wan likl maskita mash op so moch a wi! Mi se wi ha fi tek bad tingz mek juok. Laik ou di likl yuut, Wayne J, sing bout ‘Wan Panadal’.
The Tipping Point a di fos buk Gladwell rait we kom out ina 2000. An it sel aaf! A fi im ‘tipping point’ dat. Di buk pich Gladwell uova mek im a ruol ina moni. Nof, nof moni. Mi glad fi im. Im a wan a wi. Im mdaa baan rait ya so. An im faada fram Ingglan nuo gud uman.
Ier ou Gladwell eksplien imself: “The tipping point is that magic moment when an idea, trend, or social behaviour crosses a threshold, tips, and spreads like wildfire. Just as a single sick person can start an epidemic of the flu, so too can a small but precisely targeted push cause a fashion trend, the popularity of a new product, or a drop in the crime rate.”
Gladwell tek di saiyans bout ou siknis spred aal bout an divel it op. Im shuo wi ou sopn gud kyan spred siem wie. Mii tingk se rait nou, Jamieka redi fi pich uova. Chiv-V mek wi si se wi ha fi kliin op di konchri. An a no ongl doti wata mi miin. Bai di wie, di chik-V maskita lov kliin wata.
Ina im lekcha, Gladwell se wi ha fi rispek wanada an chros wanada. Wi ha fi mek evribadi ina Jamieka nuo se di uola a wi a smadi. An mii se if it tek chik-V fi fuors wi fi si se wi kyaahn gwaahn so kielis bout evriting ina Jamieka, dat a fi wi ‘Tipping Point’ fi chruu.
I’m not putting a jinx on Malcolm Gladwell. Not at all. I hope he wasn’t bitten by a mosquito and didn’t get chik-V when he came here to give a talk last week at UWI. He came to help raise money for the Sir John Golding Rehabilitation Centre. That centre was set up in 1954 to care for the large number of people who caught polio. The epidemic broke out in Jamaica in July and 759 people were infected; and 94 of them died.
Polio is another virus like chik-V. But it’s not spread by mosquitoes. You catch it directly from another person. I know a lot of us think that’s exactly how chik-V is passed on. Not only by mosquitoes. But the eminent scientists disagree. We know the difference between science and science. But don’t let me go there.
Polio destroys your nerves and twists you up immediately. The good thing about the disease is that there’s a vaccine for it. There’s none for chik-V. And when it infects you, it lingers for quite a while. A ‘good’ while. And if have any chronic illnesses, chik-V makes them rather worse. You can die because of chik-V. I think that more than 94 of us are going to die by the time chik-V is finished with us.
THE TIPPING POINT
Malcolm Gladwell wrote a book called The Tipping Point. In our language, pitch over ya so. Here’s the sub-title: How Little Things Can Make a Big Difference. It’s true. Just think about how one little mosquito has crippled so many of us! We really do have to laugh at our troubles. Like the boy, Wayne J, who sings about ‘One Panadol’.
The Tipping Point is Gladwell’s first book which was published in 2000. And it was a bestseller! That was his ‘tipping point’. The book catapulted him to fame and fortune. A huge fortune! I’m very happy for him. He’s one of us. His mother was born right here. And his father, who’s from England, chose his wife very well.
Hear’s how Gladwell explains the book’s title: “The tipping point is that magic moment when an idea, trend, or social behaviour crosses a threshold, tips, and spreads like wildfire. Just as a single sick person can start an epidemic of the flu, so, too, can a small but precisely targeted push cause a fashion trend, the popularity of a new product, or a drop in the crime rate.”
Gladwell applied to social issues the principle of how epidemics spread. He argued that good things can spread in exactly the same way. I think Jamaica is at at turning point right now. The Chiv-V epidemic has forced us to acknowledge the fact that we must clean up the country. And it’s not only dirty water I’m talking about. By the way, the chik-V mosquito loves clean water.
In his lecture, Gladwell said that we have to respect and trust each other. We have to make everybody in Jamaica know that that all of us count. And I say that if it takes chik-V to force us to see that we can’t continue to be so irresponsible about everything that matters in Jamaica, that truly is our ‘Tipping Point’.