Mi shame fi di PNP. Wa mek dem a tek set pon Andrew house? Ascorden to di headline a one Gleaner story weh publish last Monday, ‘Andrew’s mansion talking point on PNP platform’. Mi never know dem wuda stoop to dat. Better dem talk bout weh dem do fi Jamaica people fi di last four year! Tings well bad wid dem if dem ha fi a talk bout Andrew house.
Hear wa Peter Phillips im seh last week Sunday eena Portmore bout di PNP leader Portia Simpson Miller: “No one in a fi har party can ask her nuh question how she build nuh house with wall that cost billions and billions and billions of dollars. We have a leader we can trust. We have a leader Jamaica can trust.”
By di way, unu see seh a nuff, nuff Patwa Peter Phillips a chat deh so. Wa mek im no chat laka dat eena Parliament? Fi wi Jamaica language no good enough fi official business? It ongle good fi cuss off political opponent an look vote? A time wi start fi tek wi language serious an gi it proper respect.
LIE AN STORY
Anyhow, back to di house wall. It no cost no ‘billions and billions and billions of dollars’. Dat a lie an story. Peter Phillips well an know seh dat a pure foolishness. A wine im a wine up di crowd. An im mout slip. Wall cyaahn cost so much. No matter how fi wi dollar devalue. Better im did seh million an million an million a dollar.
No get mi wrong. A nuff cut-stone wall all round di house. Di front wall taller than di house. An di house no small. Mi wonder if di architect never draw no picture fi show Andrew an Juliet how di big wall wuda look front a di house an all bout di yard. Mi tink dem mek mistake. But a fi dem business. Still for all, it no right fi Peter Phillips a tell lie pon dem.
Next ting. Peter seh wi can trust Sista P. Pon di odder hand, im mek it sound like seh wi cyaahn trust Andrew. Becau it look like seh people inna fi im owna party a aks im question bout how im build house wid wall that cost “billions and billions and billions of dollars”. Serious ting.
It come een like seh Andrew an Juliet cyaahn answer no question bout weh di money come from fi build di plenty-billion house wall. An Peter no even mention di cost a di house. A so-so wall im a talk bout. If im put on di house price pon top a di wall, a nuff more billion. An nuff more question.
SISTA P JUDGEMENT
Then a who tell Peter Phillips seh wi can trust Sister P becau she no build no house wid no big wall? Perhaps wi no trust her fi odder reason. All like how she tek Dr Ferguson outa health ministry an gi im one next big job. Dat no mek wi feel confident fi trust Sista P judgement.
If Dr Ferguson cyaahn manage health ministry, a how im a go deal wid Labour an Social Security? Dat no mek no sense. Sista P shoulda send im go sit down pon back bench. But no! She build high wall round Dr Ferguson fi protect im. An it mighta cost her thousand an thousand an thousand of vote.
Mi shiem fi di PNP. Wa mek dem a tek set pan Andrew ous? Azkaadn tu di edlain a wan Gleaner stuori we poblish laas Monde, ‘Andrew’s mansion talking point on PNP platform’. Mi neva nuo dem uda stuuup tu dat. Beta dem taak bout we dem du fi Jamieka piipl fi di laas fuor ier! Tingz wel bad wid dem if dem a fi a taak bout Andrew ous.
Ier wa Peter Phillips im se laas wiik Sonde iina Portmore bout di PNP liida Portia Simpson Miller: “No one in a fi har party can ask her nuh question how she build nuh house with wall that cost billions and billions and billions of dollars. We have a leader we can trust. We have a leader Jamaica can trust.”
Bai di wie, unu si se a nof, nof Patwa Peter Phillips a chat de so. Wa mek im no chat laka dat iina Paaliment? Fi wi Jamieka langgwij no gud inof fi ofishal bizniz? It ongl gud fi kos aaf politikal opuonent an luk vuot? A taim wi staat fi tek wi langgwij siiryos an gi it prapa rispek.
LAI AN STUORI
Eniou, bak tu di ous waal. It no kaas no “billions and billions and billions of dollars”. Dat a lai an stuori. Peter Phillips wel an nuo se dat a pyuur fuulishnis. A wain im a wain op di kroud. An im mout slip. Waal kyaahn kaas so moch. No mata ou fi wi dala divalyu. Beta im did se milyan an milyan an milyan a dala.
No get mi rang. A nof kot-stuon waal aal roun di ous. Di front waal taala dan di ous. An di ous no smaal. Mi wanda if di aakitek neva jraa no pikcha fi shuo Andrew an Juliet ou di big waal wuda luk front a di ous an aal bout di yaad. Mi tingk dem mek mistiek. Bot a fi dem bizniz. Stil far aal, it no rait fi Peter Phillips a tel lai pan dem.
Neks ting. Peter se wi kyan chros Sista P. Pan di ada an, im mek it soun laik se wi kyaahn chros Andrew. Bikaa it luk laik se piipl iina fi im uona paati a aks im kweschan bout ou im bil ous wid waal dat kaas “billions and billions and billions of dollars”. Siiryos ting.
It kom iin laik se Andrew an Juliet kyaahn ansa no kweschan bout we di moni kom fram fi bil di plenti-bilyan ous waal. An Peter no iiivn menshan di kaas a di ous. A suo-so waal im a taak bout. If im put aan di ous prais pan tap a di waal, a nof muor bilyan. An nof muor kweschan.
SISTA P JOJMENT
Den a uu tel Peter Phillips se wi kyan chros Sista P bikaa shi no bil no ous wid no big waal? Paraps wi no chros ar fi ada riizn. Aal laik ou shi tek Dr Ferguson outa health ministry an gi im wan neks big jab. Dat no mek wi fiil kanfident fi chros Sista P jojment.
If Dr Ferguson kyaahn manij health ministry, a ou im a go diil wid Labour an Social Security? Dat no mek no sens. Sista P shuda sen im go sidong pan bak bench. Bot nuo! Shi bil ai waal roun Dr Ferguson fi protek im. An it maita kaas ar touzn an touzn an touzn a vuot.
LEAVE ANDREW’S HOUSE ALONE
I’m ashamed of the PNP. Why are are they paying so much attention to Andrew’s house? According to the headline of a Gleaner story published last Monday, ‘Andrew’s mansion talking point on PNP platform’. I didn’t think they would stoop to that. Better they talk about what they’ve done for the Jamaican people over the last four years! They must be very desperate if they have to be focusing on Andrew’s house.
Here’s what Peter Phillips said last Sunday in Portmore about PNP leader Portia Simpson Miller: “No one in a fi har party can ask her nuh question how she build nuh house with wall that cost billions and billions and billions of dollars. [No one in her party can ask her any questions about how she’s building a house with fence walls that cost billions and billions and billions of dollars.] We have a leader we can trust. We have a leader Jamaica can trust.”
By the way, you see that’s a lot of Patwa Peter Phillips is using there. Why doesn’t he speak that language in Parliament? Our Jamaican language isn’t good enough for official business? It’s only good for cursing political opponents and getting votes? It’s time we start taking our language seriously and give it proper respect.
Anyhow, back to those walls. They certainly don’t cost ‘billions and billions and billions of dollars’. That’s pure fabrication. Peter Phillips very well knows that’s nonsense. He was just whipping up the crowd. And his mouth slipped. No wall could cost so much. No matter how much our dollar has been devalued. Better he’d said millions and millions and millions of dollars.
Don’t get me wrong. There’s a lot of cut-stone wall all around the house. The front fence wall is taller than the house. And the house is not small. I wonder if the architect didn’t do any drawings to show Andrew and Juliet how that huge wall would look in front of the house and all around the property. I think they made a mistake. But that’s their business. All the same, it’s not right for Peter Phillips to misrepresent the cost.
Another thing. Peter says we can trust Sister P. On the other hand, he implies that we can’t trust Andrew. Because it seems as if members of his own party have been questioning him about how he’s managed to build a house with fence walls that cost “billions and billions and billions of dollars”. That’s a very serious charge.
It’s as if Andrew and Juliet can’t answer that question about the source of the funding for the multiple-billion fence wall. And Peter didn’t even mention the cost of the house. It’s only the walls he highlighted. If he adds the cost of the house to the estimate of the fence walls, that would be lots more billions. And lots more questions.
SISTER P’S JUDGEMENT
Then why is Peter Phillips so sure we can trust Sister P because she hasn’t built a house with huge fence walls? Perhaps we don’t trust her for other reasons. Look at how she’s taken Dr Ferguson out of the ministry of health and given him another big job. That doesn’t inspire any confidence whatsoever in Sister P’s judgement.
If Dr Ferguson can’t manage the health ministry, how is he going to deal with Labour and Social Security? That move makes no sense at all. Sister P should have sent him to go sit on the back bench. But no! She’s built a high wall around Dr Ferguson to protect him. And it might cost her thousands and thousands and thousands of votes.